Shehtoot

Shehtoot ke saare patte jhad jaate hain
Jab patjhad ki rukhi saansein padti hai uspe

Agle saal uspe acha fal aaye, ye soch k
Maali uske neeche ke tane kaatne lagta hai

Zameen se teen – 2 gaj tak
har shaakh juda kar di jaati hai ped se

ped ke upri hisse pe baithi
apno ko juda hote dekh
bezubaan shaakhein kurlahti rehti hain

basant ki rut aate he
har murjhai hui shaakh
khushi me jhoom uthti hai

pichle saal ke mukable zada fal aaya hai uspe

is patjhad me mai bhi apni purani shakhein kaat dunga
is basant mujhpe bhi zaada fal aayega

Adhoora

Purane ghar ke bahar ek lamp post tha
Sadak ke kinare pe, usi k neeche
Baithne ko kuch footpath sa bana hua tha

Hum ghanto wahan baithe apni yaadein taza karte
Raat ka kaunsa pehar nikal jaata, malum he nahi padta tha
Use to bolne ka mauka he na milta,
Meri bak bak band he nahi hoti thi.

Wo bas sir hilake, muskurati
Aur meri taraf tek lagaye dekhti rehti

Mai kehta “pyar ho jayega tumhe mujhse”
“tum” kehne se chid jaati thi wo.
Thoda gussa karti aur meri baat ko taal jaati

Jab ruksati ka waqt aaya to bahut royi thi wo
Aankhon me ashk bhare bhare,
apni sab bhavnayein bayan kardi


mujhse kuch kaha na gaya,
naa hi mai kuch kar paya.
Chup chaap but bane baitha raha uske pehlu me.

aaj jab mera dil kurlah utha, to uski yaad aayi
kuch kehne sun ne ko man kiya.
Use pukara, to awaaz door tak jake laut aayi.
Aur apne sath uske un ashko ki nami le aayi

Wo jaa chuki thi kahin, mujhse door, bahut door
Ab bas mai akela us lamp post ke paas
Kabhi kabhi raat ke kuch pal guzaar leta hu
Man halka ho, to kuch bad badaata hu
Par us muskurahat ke bina, kuch mukammal nahi hai

Sab adhoora hai yahan, sab sunsaan, man ab bhi bhaari hai.

Laal gulab

Har shaam jab ghar wapis jaata tha
Raaste me ik nursery padti thi
Bahar se dekho to har rang k phool khile dikhte the usme

Ek din mai bhi jake ik gulab ka paudha le aaya
Bade armaano se seencha use.
Har shaam paani diya, zarurat same pe khaad daali
Us k alawa har ek cheez us gamle se ukhaad fainki

Maali ne kaha tha laal rang ke honge gulab
Aaj uspe phool aya hai
Sab rang nazar aa rahe hain, ik laal k siwa.