Table ke Paudhe

Qudrat ke kareeb rehne ki chah me
Maine apne table pe do paudhe lagaye.
Ek pattedar aur doosra kantila cactus
Pata nahi kyu, par wo kantila cactus
mujhe zyada pyara tha
use khoob pyar se rakha maine

aur doosre ko ek kaune me rakhkar bool gaya
jab wo udaas hoke murjha jata, to mai paani daalke
use jataata ke mai hu uske sath
wo bhi jaise meri baat maan leta aur
phir se khushi me lehraane lagta
banaawti the mera pyar uske liye
ye mujhe lagta tha kayi baar
magar wo tha ke andha yakin karta tha mujhpar

wahin doosri aur wo kantedaar cactus
jaise kabhi khush he nahi hota tha mujhse
mai use roz sinchta, paani deta,
har lamha dhyan rakhta uska

jab bhi subha mai daftar aata,
to use murjhaya paata
par meri himmat na haarti
aur mai lagataar use khush karne ki koshish karta

fir ek din 3 dino ki chutti hui
mai jab wapis lauta to dono paudhon ko murjhaya paya
kuch ghoont paani ke apne sautele bête ko de
mai jaa pahuncha cactus ke paas.
Uski naraazgi se lag raha tha ke
Aaj nahi maanega wo.
Murjhaya to hua he tha, sath me gusse me neela pad gaya tha.
Mujhe samajh me nahi aya kya karun,
Kuch paani dala aur intezar kiya
Mujhe nahi pata tha ke wo intezar mujhe
Us se hamesha ke liye juda kar dega
Kayi dino tak uska neela rang nahi gaya
Aur ek din wo kala ho ke gir gaya
Mai samajh gaya ke maine use kho diya
Itna chaha use aur kuch na kar sakaa
Uski sulgi hui jade ab bhi us gamle me padi hain
Meri himmat nahi hoti use ukhaad fainkne ki
Kahi na kahin dil me umeed hai
Ke ek din phootegi jad aur kopal nikal ayegi
Firse wo apne patte failayage mere liye.

Mera sautela har subha mere paani dete he
Uchal jaata hai khushi me aur lehra ke
Maano mujhse keh raha ho
Mujhe lagao us gamle me aur utna pyar do
Mae tumhara har zakhm bhar doonga
Fir tumhe kabhi udaas nahi paunga
Bas ek baar mujhe sautele se apna bane ke dekho.